EVOLUCIÓN DATOS DO MEU MARXINAL CARÁCTER CONFINADO

Datos oficiais a 22 de abril do 2020 (os datos de poboación son os de 2019 para todos)...marco a diferenza de crecemento entre os datos do 16 e os do 22...

Desde sempre resultáronme interesantes estes traballos de ver como avanzan os datos, desta volta despois de 6 días. Isto permite ver a incidencia e eficacia das restricións, tanto no grao severo coma flexible. 

Mais tamén porque ver a unha articulista de La Voz de Galicia dicir, pouco máis, que ela non quería ser sueca porque aí se deixaba morrer aos seus habitantes, parecíame pouco serio e afastado dos datos reais a pouco que se ollen sen exaltacións propias do sentimento nacionalista español, tan de moda ultimamente. 

 Os datos demostran, mais unha vez, o comportamento exemplar de Corea de Sur, pois non se move na porcentaxe ínfima de contaxios con respecto ao total da poboación e moi pouco na taxa que compara falecementos con casos positivos confirmados.

Interesa tamén confirmar o paralelismo en canto a contaxios entre Dinamarca (restricións severas) e Suecia (restricións flexibles), se ben o comportamento de defuncións é máis grave no caso de Suecia.

Aínda así, se fixéramos a conta de ver canto é a porcentaxe de falecidos por coronavirus con respecto ao total poboacional, sáenos un 0,017 en Suecia e en Dinamarca un reducido 0,006. En España sairía un 0,046...sempre por diante dos países nórdicos...tanto de Dinamarca coma de Suecia...(de facer a articulista da La Voz estes cálculos non diría as tonterías que escribiu).

Alemania segue mantendo unhas porcentaxes estables no sentido de que seguen sendo máis da metade inferiores á española (0,178 fronte ao 0,44%).

De maneira máis ou menos semellante, podemos citar a Portugal que, se ben con moita menos poboación, mantén unha porcentaxe de contaxios a metade inferior a España e unha taxa de falecementos á altura de Alemania.

Polo tanto, non hai datos que invaliden as estratexia de Alemania ou Suecia, máis flexibles no tocante a control de mobilidade persoal e, polo tanto, máis respectuosos con dereitos e liberdades. A terapia de test masivos + localización e control dos grupos transmisores revélase -ao meu humilde entender- como a máis equilibrada. 

De feito, Suecia non interrompeu o ciclo vital en ningún eido, só ponderaron os encontros multitudinarios reducindo aforo de asistencia, pero a vida seguiu máis ou menos intacta, polo que non van padecer ningunha síncopa. Alemania abriu o 20 de abril lugares como talleres, librerías, perruquerías, e o 4 de maio anuncian un retorno pausado ás aulas, ao igual que Portugal. Nós seica, seguiremos con Estado de Alarma até o 9 de maio...