Mortes que revelan

Morre un político
morre por enfermidades malvadas
que arrastran ao SER ao abismo
á negrura
e con el
aos que o envolven con agarimo

Está ben
que xordan entón as voces amigas
para dicir
mágoa
un bo home
un bo marido
un bo pai

Pero a parafernalia
política de cabaret
converte aos demonizadores
en eternos amigos
e os discursos de crispación
ceden aos dunha imaxe que se esculpe
en verdades que non se cren

Por iso
este que escrebe
opta polo silencio contemplativo
e prefire pensar
que a familia
merece o meu apoio e consideración
e que lamento a perda dun home aínda non vello

Por iso
opto por rexeitar toda a farándula
que recolle versos e reversos
para entronizar
cando antes o expulsaron do mesmo

Por que mentir?
Por que non calan e simplemente ollan, escoitan
e se saben ou poden choran?

Porque é necesario ollar o espello vermello

Cando nacen as intencións de medir as palabras
xorden as iniciativas para alteralas
para subverter o seu valor e mesmo
xa é unha realidade matalas

Por iso
no espello vermello
que debuxarei pouco a pouco
quen sabe se ben ou mal
está a construción da destrución
do capital

A ilusión do comunista
é sempre inalterable
a construción de dita destrución

O contributo destas liñas
vai nese sentido

ás veces con forza de versos
que xogan coas linguas
até retorcelas de pracer

ás veces coa forza dos verbos
que alumean berros
ata esnaquizar o silencio