Recoñezo que xa perdín a capacidade de enfado: antes, e desde que participo en actividades políticas, recoñezo que cando facíamos algo importante e era silenciado, fervíame o sangue e maldicía ao estado de poder. Un exemplo que lembro: unha manifestación estatal de máis de 10.000 persoas en Salamanca totalmente silenciada.
Hoxe, despois dun bo número de anos ollando e coñecendo cal é a estratexia dos empresarios da información e do poder...xa non me abraia. Xa non me sorprende asistir ao muro de silencio sobre o continuado traballo que realiza a nosa organización en Compostela e da que son, por decisión asemblearia, cabeza de lista.
Hai na cidade, polo de agora, un medio que nos dedica un anaquiño, pequeno, pero algo é algo, e outro que, sistematicamente, agás un par de días de oito que levamos de campaña, silencia todo o que fan os non representados. Estratexia?
Debe ser iso que se chama información plural. E hai que ver como o espazo que se dedican aos representados é perfectamente "calculado", 1 páxina (PSdG), 1 páxina (PP), media (BNG). Isto nas seccións de edicións locais amais das que lles dedican en nacional. Pra os demais, silencio e silencio. Sinxelamente pido que non se queixe ningún dos 3 representados en Compostela sobre o tratamento que recibiron nos medios.
Até hai paradas sobre o que escriben (seguro que son eles?) nas redes...; curioso, quen escribe isto ten tamén as súas redes...e sempre as empregou pra informar de forma alternativa do que se silencia nos medios...., mais tamén aí curioso (ou non?) silencio.
E que dicir dos enormes gastos electorais? Sedes para as eleccións, colchonetas pra atrapar soños de nenos e nenas e votos de seus pais e nais, gafas pra non se sabe moi ben que, coches, asoballamento de publicidade de todo tipo (caramelos, chisqueiros, revistas (que non dípticos), pegatinas, bolis...; páxinas a cotío na prensa;....) Debe ser iso o que eles entende por austeridade.
En fin, hoxe collín a bici e procurei desconectar deste ruído pra acoller o das ideas que me achega a natureza. Coller folgos e seguir co duro traballo que será silenciado.
Aucun commentaire:
Enregistrer un commentaire