A dignidade que unha persoa ten ao nacer debera ser inalienable, inviolable. No entanto, o mundo de hoxe representa a constatación de que o estilo de vida e os éxitos dun 20% da poboación humana faise sobre o 80% restante: a explotación do ser humano polo ser humano....humano, realmente?
O máis triste e tamén o máis aldraxante e alporizante é comprobar como ese 20% blinda as súas fronteiras ás persoas menos favorecidas polo xogo de dominación e explotación que representa o capitalismo nesta fase neoliberal. E esa blindaxe faise con leis que emanan de gobernos e parlamentos que se autoproclaman democráticos. Nada máis triste. O asilo e a hospitalidade desapareceron da aplicación práctica dos países enriquecidos. Os números son irrisorios e as persoas que veñen de fóra fuxindo da violencia (fame, guerra, explotación, ...) xa non o solicitan sabedores de que non se concede asilo. O capitalismo utiliza ás persoas en base á súa rendibilidade: non lle importa o enriquecemento social, cultural.
Hoxe, en Compostela, ás 12h, organizada polo Foro Galego de Inmigración, organización non institucionalizada que agrupa a organizacións que traballan con ou constituidas por persoas inmigrantes, tivo lugar unha manifestación. Non eramos moi numerosos, pero foi satisfactorio e logramos facer visibles á sociedade "mirona" e "espectadora" que NINGÚN SER HUMANO É ILEGAL, QUE SER SOLIDARIO NON É DELITO, QUE SER INMIGRANTE NON É DELITO.
Pero non eramos todos os que deberamos: faltaban sindicatos, cabezas visibles de organizacións políticas, como se isto da defensa da dignidade das persoas non fora con elas. E faltaba moita sociedade: alienación? ou sinxelamente que están a favor do acoso ao que nos somete a policía? alienación? ou sinxelamente que queren realmente ternos explotados e explotadas ou co medo no corpo a unha deportación a un lugar do que fuximos?
Seguiremos loitando.
Aucun commentaire:
Enregistrer un commentaire