ESPONTÁNEO COLLAGE POLA LIBERDADE DA PALABRA

ESPONTÁNEO COLLAGE POLA LIBERDADE DA PALABRA

divertimento serio a partir do diálogo con Antonio Gamoneda e a súa Descripción de la mentira (1977)

Non nos resistamos ou si

a mentira tece a súa trampa

con veleno e seduce os xiros

da semántica

a palabra perde as letras

unha a unha

feridas de morte

Un xoguete en mans dos arteiros

e canallas

de todo signo

expelen o crítico sentido crítico

a un lugar miserento

onde o fedor é o lixo

Porque non hai máis grande mentira

que a mentira que se impón

como a verdade única do Gobernante

así morren as democracias

Cando hai mentira

tamén hai censura

e esquecemento

'el olvido entró en mi lengua y no tuve otra conducta que el olvido'

sen dúbida      amigo Gamoneda

'éste es un año de cansancio. Verdaderamente es un año muy viejo'

porque así encerrados

perdemos vida

pasan os días coma unha procesión

da Santa Compaña

disposta a levar a enerxía e os folgos

para fundilos na forxa do alén

Mentres a mente rebule e ferve

e acoitela todo vestixio da falsidade

que se impón detrás dos sorrisos

Maquiavelo habita aí

sobre o meu cadavre

cuspen as bondades delatoras

Para esquecer hai que coñecer

para coñecer hai que ler

e pensar

moito

'Después del conocimiento y el olvido ¿Que pasión me concierne?

'Quién juzgará a quien ha traicionado a la traición?

Quen vixila a quen nos vixila?

Todo se volve unha enorme pantalla

o futuro din é este presente

incomunicado de pel e tacto

o diagnóstico será mesmo

un canto de orfandade de mans

Os argumentos retórcense e

a diarrea sacude os interiores

da palabra xusta

ponderada no exercicio

hoxe axusticiada

no malabar

imposible

e ferinte

do diálogo

'Siéntate con dulzura en el medio o

al borde de las ruinas'

E contempla o futuro

de vates e profetas

mentres eu devezo

pola colleita do pasado

'Nuestros labios envejecieron en palabras incomprensibles'

Non quero un futuro de videoxogo

non quero o simulacro do amor

Para esquecer hai que coñecer

eu coñecín

¿Qué harías tú si tu memoria estuviera llena de olvido, qué harías

tú en un país al que no querías llegar?

Xabier Ron

21-abril-2020

audio con lectura do diálogo